Original Radis

Een oohles Weib - aus Roalis kumm mich - in Roalis bin ich daheeme - un da kann ich eich dardazu was soahn. Mir laawern mit ne Sproache, bei die ich als kleenes Mächen nich vill verstund. Do jibs drehes Jras un Molläppel! Jetze tu ich ooch ma een bischen so kaaken. Da mister nu ma jut uffmarken, dasder mich allenthalbn verstehn tut.

Unse Jut jehärte de Bodenhausenschen. Die woarn da bis de Russen bei se ins Schloß stunden. De alte Gnädige, was de Baronin war kunnte jut kochen un hotte ins oohle Kochbuch von de Familie immer weller rinjeschremm. De Jungschen von de Familie hons uns gejebn. Nu han mer drin gestebert und eenijes vor euch rausjediebet und ins kleene Heft laßt abdrucken.

Ehner von unse Farrer hots doch tatsächlich 57 Joahr in unsres Dorf ausjeholn. Der hoat sich mußt jlei noch mit um de Schäfchen in Schleesen un Uthausen kimmern. Un ehne Schrift hotte der! Da kann mer sich jornich vorstell das ehner lesen kunnte, was ter jeschremm hoat. Jeider hatte geheßen. Und de Leite kam jut mitn aus. Vor de Kerche bein Turm, dens nich mehr gibbet, is se irjendwo bejrabm.

Wenn ter durch Roalis na Hänichen foahrt, hätt der bestimmt das Haus, was boale infalln will an de Hoptstraoße bei uns jesehn. S hat ma bessere Zeiten jehot mit seine Bewohner - Seeler Richters Jeschwister woarns. Die eene is Maria. Die hoatte nich bloß ihren Esel inn Jriff wenn se mitn uffn Acker fuhr, och die Orjel un enn Kerchenchor, und das alles mit den Mantel und die Mitze wo se jrade mit uffn Woaren sitzt. Oabends schrebb se denn janz flink ihre Jedanken zus Dorfleben unn ihre Kindhet uff. Ewwer unsren Kerchturm machte se een Jedicht. Enn Hedelied hat se sich ooch ausjedacht. Dar dazu hotse jlei noch de Noten jetan. Ne kleene Dichterin woar se un een Orijinal!

Der Kruch, en Philsof, is ooch son Frichtchin aus Roalis. Seine Stundenten hotte ufjelefert bei de Freiheitskrieje mit zu kämpeln. Un ewer zweehunnert Biecher hotte jeschremm. Die kenn se ooch in ville Länder.

Unser bekanntestes Orijinal is Jalle. Mit seine Sterneguukerei hot der nich bloßn Neptun da obne entdeckt. Der hoat och mit seine Rechnerei dardazu beijetran dasses Navi uns soaht, wo mer langfahrn missen. Un so ehner is bei uns in Busch groß geworn. Mit de Holzlatschen musste eene Stunde bis na de Schule in Roalis loofen.

Da hann mehr noch Handball in nen Verein. Der wurde grade 70, is awer noch jut beisamm un bejeistert seine Fans. Friher kannte mer nich de englischen Brejriffe. Da soate mer bloß Anhänger.

Jetze hannich eich jenuch volljequackert. Wenn`ter nu neijierich geworn sit, denn misster janz enfach das Uffjeschremmne koofen unn selwer schmeekern. Natirlich hann mer Unkosten jehoat un een paar Fennge mißt denn schon davor rausricken.

Krein tut der de Hefte
ins Dorfgemeinschaftshaus Radis offs Jut,
Radiser Bahnhofstr. 18a,
Tel. 034953/ 39 595,
dgh-radis@kemberg.de
(E.Erdmann)